قرۃ العین حیدر

قرۃ العین حیدر سجاد حیدر یلدرم کی بیٹی تھیں۔ علی گڑھ میں پیدا ہوئیں، لکھنؤ یونیورسٹی سے انگریزی میں ایم اے کیا۔ اعلیٰ تعلیم کے لیے یوروپ میں بھی رہیں۔ وہ ممبئی میں کئی انگریزی رسائل سے منسلک رہیں۔ ممبئی کے طویل قیام کے بعد دہلی آگئیں۔

علی گڑھ مسلم یونیورسٹی، علی گڑھ اور جامعہ ملیہ اسلامیہ، دہلی میں وزیٹنگ پروفیسر کی حیثیت سے شعبہء اردو سے وابستہ رہیں۔

“ستاروں سے آگے”، “شیشے کے گھر”، “پت جھڑ کی آواز”، “روشنی کی رفتار” اور “جگنوؤں کی دنیا” ان کی کہانیوں کے مجموعے ہیں۔ “میرے بھی صنم خانے”، “سفینہء غمِ دل”، “آگ کا دریا”، “آخر شب کے ہم سفر”، “گردشِ رنگِ چمن” اور “چاندنی بیگم” ان کے ناول ہیں۔ “کار جہاں دراز ہے” ان کا طویل سوانحی ناول ہے۔ “چائے کے باغ”، دل رٗبا”، “اگلے جنم موہے بٹیا نہ کیجو” اور “سیتا ہرن” ان کے ناولٹ ہیں۔ “داستانِ عہدِ گل ” (مضامین اور انٹرویو) اور دامانِ باغباں” (خطوط) ان کی معروف کتابیں ہیں۔