انتخابِ کلامِ میر

ایک تعارف

مولوی عبدالحق

intikhab-e-kalam-e-meer

جہاں سے دیکھیے یک شعر شور انگیز نکلے ہے

قیامت کا سا ہنگامہ ہے ہر جا میرے دیواں میں

میر تقی میر ؔ سرتاج شعرائے اردو ہیں۔ ان کا کلام اسی ذوق و شوق سے پڑھا جائے گا جیسے سعدیؔ  کا کلام فارسی زبان میں پڑھا جاتا ہے۔

میرؔ صاحب کی شاعری میں الفاظ کا درست استعمال اور ان کی خاص ترتیب و ترکیب زبان میں موسیقی پیدا کردیتی ہے۔ اس کے ساتھ اگر سادگی اور پیرایہ بیان بھی عمدہ ہو تو شعر کا رتبہ بہت بلند ہوجاتا ہے۔ میرؔ صاحب کے کلام میں یہ سب خوبیاں موجود ہیں اور اس کے ساتھ ہی ان کا کلام ایسا درد بھرا ہے کہ اس کے پڑھنے سے دل پر چوٹ سی لگتی ہے جو لطف سے خالی نہیں ہوتی۔

مولوی عبدالحق نے 1921ء میں میر تقی میؔر کے کلام کا انتخاب مرتب کیا اور اسے ’’انتخاب کلام میر‘‘ کے نام سے طبع کرایا۔ اس میں152  صفحات پر مشتمل کلام اور 40  صفحات کا مقدمہ ہے مقدمے میں میؔر کے ذاتی احوال کے علاوہ ادب میں ان کا مرتبہ و مقام متعین کیا ہے۔ مولوی عبدالحق کا خیال ہے:

’’کسی شاعر کے کلام پر اس کی طبیعت اور سیرت کا اس قدر اثر نہ پڑا ہو گا جتنا میر کے کلام میں نظر آتا ہے۔‘‘

اور اس نظریہ کی بنیاد پر مولوی عبدالحق نے میر تقی میر کے مخفی اور ظاہری حالات زندگی، ان کے خاندان و وطن، ان کی دلی میں آمد اور خان آرزو سے تعلقات ان کی پریشان حالی، دلی کی بربادی پر لکھنو کی طرف ہجرت اور وہاں کے روز و شب اور میر کی آشفتہ مزاجی وغیرہ کا تفصیل سے ذکر کیا ہے۔مرتب نے ابتدا غزلیات سے کی ہے اور ان کو ردیف کے اعتبار سے ترتیب دیا ہے اس کے بعد قطعات، رباعیات اور مستزاد ہندی ہیں۔ مخمسات میں مخمس در شہر گاما گفتہ شدہ اور شہر آشوب ہے، اور مثنویات میں جھوٹ، گھر کا حال، در ہجو خانہ خود، جوش عشق دنیا، مناجات در تعریف عشق اور خواب و خیال شامل ہیں۔

مولوی عبدالحق نے میر تقی میؔر کے بعض اردو اشعار کا شیخ سعدی کے ایسے فارسی اشعار سے موازنہ کیا ہے جو موضوع یا مفہوم کے اعتبار سے مماثلت رکھتے ہیں اور میر تقی میؔر کے کلام پر مجموعی تنقیدی نگاہ ڈالتے ہوئے لکھا ہے:۔

 ’’میؔر صاحب کی رباعیات میں کچھ کم لطف نہیں اور بعض تو بہت اچھی ہیں ان کے علاوہ متفرق مخمس، مستزاد اور فرد وغیرہ ہیں۔ لیکن میؔر کا اصل رنگ غزل میں ہی پایا جاتا ہے اور اس میں ان کا کوئی مقابلہ نہیں کر سکتا۔‘‘

یہ کتاب 1921ء میں دائرۃ الافادہ حیدر آباد سے انجمن ترقی اردو اورنگ آباد نے شائع کرائی تھی۔

intikhab-e-kalam-e-meer

نصاب میں شامل غزل کا مطالعہ کرنے کے لیے درج ذیل لنک پر کلک کریں

انتخابِ کلامِ میر میں شامل بیس غزلیں

اگر آپ مطالعہ کرنا چاہتے ہیں تو کتاب حاضر ہے