افسانہ عیدگاہ کا خلاصہ، تجزیہ، کردار نگاری اور اہم سوالات | پریم چند

رمضان کے تیس روزوں کے بعد عید کی نہایت خوبصورت اور رنگین صبح آئی ہے۔ پورے گاؤں میں عیدگاہ جانے کی دھوم ہے۔ جہاں حامد کے دوستوں کی جیبوں میں قارون کا خزانہ (دس بارہ پیسے) ہے، وہیں حامد کے پاس صرف تین پیسے ہیں ۔ اس کے پیروں میں جوتے نہیں اور سر پر ایک پرانی دھانی ٹوپی ہے جس کا گوٹا سیاہ ہو چکا ہے، مگر وہ پھر بھی سب سے زیادہ خوش ہے۔

گاؤں کے بچے اپنے بڑوں کے ساتھ شہر کی طرف روانہ ہوتے ہیں۔ راستے میں بڑی بڑی عمارتیں، عدالت، کالج اور کلب گھر آتے ہیں۔ عیدگاہ پہنچ کر حامد دیکھتا ہے کہ نماز کا منظر بے حد منظم ہے جہاں لاکھوں سر ایک ساتھ سجدے میں گرتے ہیں۔ یہ اتحاد اور بھائی چارے کا ایک ایسا منظر ہے گویا ایک لڑی میں تمام موتی پرو دیے گئے ہوں۔

نماز کے بعد بچے میلے پر ٹوٹ پڑتے ہیں۔ محمود، محسن اور دوسرے دوست ہنڈولے (جھولے) پر بیٹھتے ہیں، لیکن حامد اپنے تین پیسے ایک چوتھائی مزے کے لیے خرچ نہیں کرتا۔ پھر کھلونوں کی دکانوں پر محمود سپاہی، محسن بہشتی، نورے وکیل اور سمیع دھوبن خریدتے ہیں جن کی قیمت دو دو پیسے ہے۔ حامد ان مٹی کے نازک کھلونوں کو فضول سمجھ کر دل کو سمجھا لیتا ہے۔ مٹھائیوں کی دکان پر بھی وہ اپنی خواہش پر قابو پاتا ہے جب اس کے دوست سوہن حلوا اور ریوڑیاں کھا کر اسے للچاتے ہیں۔

حلوائیوں کی دکانوں کے بعد لوہے کی ایک دکان پر حامد کی نظر چِمٹے پر پڑتی ہے۔ اسے اپنی دادی کی یاد آتی ہے کہ روٹیاں پکاتے وقت ان کی انگلیاں جل جاتی ہیں۔ وہ سوچتا ہے کہ کھلونوں سے کیا فائدہ، وہ تو گھر پہنچتے پہنچتے ٹوٹ جائیں گے۔ دکاندار پہلے چھ پیسے بتاتا ہے، لیکن حامد کے پختہ ارادے کو دیکھ کر وہ تین پیسے میں چِمٹا اسے دے دیتا ہے۔

حامد اپنے چِمٹے کو کندھے پر رکھ کر فخر سے دوستوں کے پاس آتا ہے۔ جب دوست مذاق اڑاتے ہیں، تو حامد اپنے دلائل سے ثابت کرتا ہے کہ اس کا چِمٹا ‘رستمِ ہند‘ ہے۔ وہ کہتا ہے کہ اس کا چِمٹا آگ، پانی اور طوفان میں برابر کھڑا رہے گا، جبکہ ان کے مٹی کے کھلونے ایک ٹھوکر سے پاش پاش ہو جائیں گے۔ حامد کی منطق ایسی ہوتی ہے کہ سب دوست باری باری اپنے مہنگے کھلونے دے کر حامد کا چِمٹا ہاتھ میں لینا چاہتے ہیں۔

 گھر پہنچتے ہی دوستوں کے کھلونوں کا عبرت ناک انجام ہوتا ہے: محسن کا بہشتی بہن کے ہاتھ سے گر کر ٹوٹ جاتا ہے، نورے کا وکیل دیوار سے گر کر فنا ہو جاتا ہے اور محمود کا سپاہی ایک ٹانگ سے محروم ہو جاتا ہے۔ جب حامد گھر پہنچتا ہے، تو امینہ اسے گود میں اٹھا لیتی ہے۔ ہاتھ میں چِمٹا دیکھ کر وہ پہلے ناراض ہوتی ہے کہ لڑکے نے دوپہر تک کچھ کھایا پیا نہیں اور یہ لوہا اٹھا لایا۔ لیکن جب حامد معصومیت سے کہتا ہے کہ "تمہاری انگلیاں توے سے جل جاتی تھیں اس لیے میں نے یہ لے لیا"، تو امینہ کا سارا غصہ شدید محبت میں بدل جاتا ہے۔ وہ روتے ہوئے حامد کو دعائیں دینے لگتی ہے اور اس کی آنکھوں سے آنسو گرنے لگتے ہیں۔ حامد اس وقت اس عظیم قربانی اور محبت کے راز کو نہیں سمجھ سکتا تھا، لیکن امینہ کا دل اپنے پوتے کی اس سمجھداری اور ایثار پر بھر آتا ہے۔