افسانہ پنچایت: خلاصہ، مرکزی خیال، کردار نگاری اور اہم سوالات | منشی پریم چند

افسانے کا آغاز جمن شیخ اور الگو چودھری کی گہری دوستی سے ہوتا ہے۔ ان کی دوستی کا آغاز بچپن میں ہوا جب دونوں جمن کے والد شیخ جمعراتی سے تعلیم حاصل کرتے تھے۔ ان دونوں میں اس قدر اعتماد تھا کہ جب ایک حج پر جاتا تو اپنا گھر دوسرے کے سپرد کر دیتا تھا۔

شیخ جمن کی ایک بیوہ خالہ تھیں جن کی کچھ ملکیت تھی لیکن کوئی وارث نہ تھا۔ جمن نے سبز باغ دکھا کر وہ جائیداد اپنے نام کروا لی۔ جب تک رجسٹری نہیں ہوئی تھی، خالہ کی خوب خاطر مدارات ہوئی، لیکن رجسٹری کے بعد جمن اور ان کی اہلیہ فہمین کا رویہ بدل گیا۔ فہمین خالہ کو کڑوی باتیں سناتی اور جمن بے حس ہو گیا۔ تنگ آ کر خالہ نے الگ کھانا پکانے کے لیے ماہوار رقم کا مطالبہ کیا، جسے جمن نے مسترد کر دیا۔ اس پر خالہ نے پنچایت بلانے کی دھمکی دی۔

خالہ نے گاؤں بھر میں گھوم کر فریاد کی اور آخر کار الگو چودھری کے پاس پہنچیں۔ الگو دوستی کی وجہ سے ہچکچا رہا تھا، لیکن خالہ کے اس سوال نے کہ "بیٹا! کیا بگاڑ کے ڈر سے ایمان کی بات نہ کہو گے؟" اسے جھنجھوڑ کر رکھ دیا۔ پنچایت بیٹھی تو خالہ نے الگو چودھری کو ‘سرپنچ’ نامزد کیا۔ جمن کو یقین تھا کہ الگو اس کا دوست ہے، اس لیے فیصلہ اس کے حق میں ہوگا۔ مگر جب الگو منصف کی کرسی پر بیٹھا تو اس نے انصاف کا دامن نہ چھوڑا اور فیصلہ سنایا کہ جمن کو خالہ کے لیے ماہوار گزارہ مقرر کرنا ہوگا، ورنہ رجسٹری منسوخ سمجھی جائے گی۔ اس فیصلے نے جمن اور الگو کی پرانی دوستی کی جڑیں ہلا دیں اور دونوں دشمن بن گئے۔

کچھ عرصہ بعد الگو چودھری کا ایک بیل مر گیا۔ الگو کو شک تھا کہ جمن نے اسے زہر دیا ہے، جبکہ جمن اسے الگو کی دغا بازی کی سزا سمجھتا تھا۔ الگو نے اپنا دوسرا بیل گاؤں کے ایک بنئیے سمجھو ساہو کو ایک ماہ کے ادھار پر بیچ دیا۔ سمجھو ساہو نے اس بیل سے بے پناہ کام لیا، اسے چارہ کم دیتا اور دن میں کئی کئی پھیرے لگواتا۔ ایک دن بیل زیادہ بوجھ کی وجہ سے راستے میں ہی گر کر مر گیا۔ جب الگو نے بیل کی قیمت مانگی تو سمجھو ساہو اور اس کی بیوی نے پیسے دینے سے انکار کر دیا اور الزام لگایا کہ الگو نے انہیں بیمار بیل دیا تھا۔

معاملہ ایک بار پھر پنچایت میں پہنچا۔ اس بار سمجھو ساہو نے دشمنی کا فائدہ اٹھانے کے لیے جمن شیخ کو سرپنچ تجویز کیا۔ الگو کا دل دھک دھک کرنے لگا، لیکن اس نے اعتراض نہ کیا۔ جب جمن شیخ سرپنچ کی کرسی پر بیٹھا تو اسے اپنی ذمہ داری کا احساس ہوا۔ اسے لگا کہ وہ اس وقت خدا کی عدالت میں بیٹھا ہے اور اس کے منہ سے نکلنے والا ہر لفظ خدا کا حکم ہے۔ اس نے جرح کے بعد فیصلہ سنایا کہ سمجھو ساہو کو بیل کی پوری قیمت ادا کرنی ہوگی، کیونکہ جس وقت بیل خریدا گیا تھا وہ تندرست تھا اور اس کی موت محض زیادہ کام لینے اور چارے کی کمی کی وجہ سے ہوئی۔

یہ فیصلہ سن کر الگو نہال ہو گیا اور نعرہ لگایا: "پنچایت کی جے، یہ انسان کا کام نہیں، پنچ میں خدا بستا ہے"۔ جمن الگو کے پاس آیا، اسے گلے لگایا اور روتے ہوئے کہا کہ آج اسے معلوم ہوا کہ پنچ کی مسند پر بیٹھ کر نہ کوئی کسی کا دوست ہوتا ہے اور نہ دشمن۔ دونوں کی دوستی دوبارہ بحال ہو گئی اور ان کے دلوں کی کدورت دھل گئی۔