کہانی قول کا پاس: خلاصہ، مرکزی خیال، کردار نگاری اور اہم سوالات | منشی پریم چند

یہ کہانی مغل شہنشاہ اکبر کے دور کی ہے جب وہ ہندوستان کا بہت سا حصہ فتح کر چکا تھا مگر راجپوتانہ کی تسخیر ابھی باقی تھی ۔ راجپوتوں کا سردار رانا پرتاپ سنگھ مغلوں سے شکست کھانے کے بعد اپنے بال بچوں کے ساتھ جنگلوں میں روپوش تھا ۔ اسی فوج میں ایک نہایت بہادر اور جری راجپوت سردار رگھوپت سنگھ بھی تھا، جس کی بہادری کے قصے مغل فوجوں میں مشہور تھے اور اکبر کے سپاہی اسے پکڑنے کی مسلسل کوششوں میں ناکام رہتے تھے ۔

رگھوپت سنگھ کی ایک بیوی اور ایک اکلوتا بیٹا تھا ۔ جب رگھوپت لڑائی کے لیے نکلا تو اس کا بیٹا سخت بیمار تھا، مگر اس نے اپنے فرض کو مقدم رکھا ۔ ایک دن جب اسے خبر ملی کہ اس کا بیٹا زندگی کی آخری گھڑیاں گن رہا ہے تو وہ مامتا اور محبت سے مجبور ہو کر چھپتے چھپاتے اپنے گھر پہنچا ۔

اکبر نے رگھوپت کو پکڑنے کے لیے اس کے گھر پر سخت پہرہ بٹھا رکھا تھا ۔ جیسے ہی رگھوپت گھر کے دروازے پر پہنچا، مغل پہرے دار نے اسے روک لیا ۔ رگھوپت نے پہرے دار سے التجا کی کہ اس کا بیٹا مر رہا ہے، اسے صرف ایک بار اپنے بچے کو دیکھنے کی اجازت دی جائے، وہ وعدہ کرتا ہے کہ دیکھ کر فوراً واپس آ جائے گا اور خود کو سپاہی کے حوالے کر دے گا ۔ سپاہی اس کی بات پر یقین کر لیتا ہے اور اسے اندر جانے کی اجازت دے دیتا ہے ۔

گھر کے اندر رگھوپت کی بیوی اسے دیکھ کر بہت خوش ہوتی ہے اور اسے مشورہ دیتی ہے کہ وہ دوسرے دروازے سے نکل کر بھاگ جائے ۔ مگر رگھوپت سنگھ ایک سچا راجپوت تھا، اس نے صاف انکار کر دیا اور کہا کہ وہ پہرے دار کو اپنا "قول” (وعدہ) دے چکا ہے اور وہ جھوٹ نہیں بول سکتا ۔ وہ اپنے بیمار بیٹے کو دیکھ کر اور بیوی کو دلاسا دے کر واپس دروازے پر آ گیا اور پہرے دار سے کہا کہ اب وہ اسے گرفتار کر سکتا ہے ۔

پہرے دار رگھوپت کی سچائی اور دیانتداری سے اتنا متاثر ہوا کہ اس نے رگھوپت کو بھاگ جانے کا موقع دیا اور کہا کہ جب تم پر برا وقت آئے تو میری بھی مدد کرنا ۔ رگھوپت وہاں سے چلا گیا، مگر تھوڑی ہی دیر بعد ایک مغل افسر وہاں آ پہنچا ۔ جب اسے پتہ چلا کہ پہرے دار نے رگھوپت کو جانے دیا ہے، تو اس نے پہرے دار کو گرفتار کر لیا ۔ رگھوپت جو ابھی قریب ہی تھا، یہ سن کر واپس آ گیا کہ اس کی وجہ سے ایک بے گناہ سپاہی مصیبت میں ہے ۔ اس نے خود کو مغل افسر کے حوالے کر دیا تاکہ پہرے دار بچ سکے ۔

اگلے دن جب دونوں (رگھوپت اور پہرے دار) کو قتل کرنے کے لیے میدان میں لایا گیا، تو وہاں شہنشاہ اکبر خود پہنچ گیا ۔ اکبر نے جب رگھوپت کی بہادری، سچائی اور پہرے دار کی انسانی ہمدردی کا واقعہ سنا تو اس کا دل پگھل گیا ۔ اس نے کہا کہ اسے ایسے ہی بہادر سپاہیوں کی ضرورت ہے جو بادشاہ سے زیادہ خدا سے ڈرتے ہوں ۔ اکبر نے ان دونوں کا قصور معاف کر دیا اور رگھوپت کی بہادری کی تعریف کی ۔ رگھوپت اکبر کی اس دریادلی سے اتنا متاثر ہوا کہ اس نے اکبر کے قدموں میں گر کر عہد کیا کہ وہ اب کبھی اکبر کے خلاف تلوار نہیں اٹھائے گا۔