پیش خدمت ہے سعادت حسن منٹو کے مجموعہ “ٹھنڈا گوشت” میں شامل چھٹا افسانہ “خورشٹ”۔ پڑھنے کے بجائے سن بھی سکتے ہیں۔
خورشٹ
ہم دلّی میں تھے۔ میرا بچہ بیمار تھا۔ میں نے پڑوس کے ڈاکٹر کاپڑیا کو بلایا وہ ایک کبڑا آدمی تھا۔ بہت پست قد لیکن بے حد شریف ۔ اس نے میرے بچے کا بڑے اچھے طریقے پر علاج کیا ۔ اس کو فیس دی تو اس نے قبول نہ کی ۔ یوں تو وہ پارسی تھا لیکن بڑی شستہ و رفتہ اُردو بولتا تھا ، اس لئے کہ وہ دلّی ہی میں پیدا ہوا تھا اور تعلیم اس نے وہیں حاصل کی تھی ۔
ہمارے سامنے کے فلیٹ میں مسٹر کھیش والا رہتا تھا۔ یہ بھی پارسی تھا۔ اسی کے ذریعے سے ہم نے ڈاکٹر کاپڑیا کو بلایا تھا۔ تین چار مرتبہ ہمارے یہاں آیا تو اس سے ہمارے تعلقات بڑھ گئے۔ ڈاکٹر کے ہاں میرا اور میری بیوی کا آنا جانا شروع ہو گیا۔ اس کے بعد ڈاکٹر نے ہماری ملاقات اپنے لڑکے سے کرائی، اس کا نام ساوک کاپڑیا تھا۔ وہ بہت ہی ملنسار آدمی تھا۔ رنگ بے حد زرد ،ایسا لگتا تھا کہ اس میں کچھ ہے ہی نہیں سنگر مشین کمپنی میں ملازم تھا۔ غالبا پانچ چھ سو روپے ماہوار پاتا تھا۔ بہت صاف ستھرا رہتا تھا ۔ اس کا گھر تو ہمارے گھر سے کچھ فاصلے پر تھا بہت نفاست سے سجا ہوا تھا۔ مجال ہے کہ گرد و غبار کا ایک ذرہ بھی کہیں نظر آجائے ۔
جب میں اور میری بیوی شام کو اُن کے ہاں جاتے تو وہ اور اس کی بیوی خورشید جس کو پارسیوں کے زبان میں خورشٹ کہا جاتا تھا بڑے تپاک سے پیش آتے اور ہماری خاطر تواضع کرتے۔
خورشید یعنی خورشٹ لمبے قد کی عورت تھی۔ عام پارسیوں کی طرح اس کی ناک بدنما نہیں تھی لیکن خوبصورت بھی نہیں تھی۔ موٹی پکوڑا ایسی ناک تھی، لیکن رنگ سفید تھا اس لئے گوارا ہوگئی تھی ۔ بال کٹے ہوئے تھے، چہرہ گول تھا خوش پوش تھی اس لئے اچھی لگتی تھی۔ میری بیوی سے چند ملاقاتوں ہی میں دوستی ہو گئی ۔چنانچہ ہم ان کے ہاں اکثر جانے لگے ۔ وہ دونوں میاں بیوی بھی ہر دوسرے تیسرے روز ہمارے ہاں آجاتے تھے اور دیر تک بیٹھے رہتے تھے۔
ہم جب بھی ساوک کے ہاں گئے ، ایک سکھ کو ان کے ہاں دیکھا۔ یہ سکھ ایک تنومند آدمی تھا۔ بہت خوش خلق – ساوک نے مجھے بتایا کہ سردار زور آور سنگھ اس کا بچپن کا دوست ہے۔ دونوں اکھٹے پڑھتے تھے۔ ایک ساتھ انہوں نے بی اےپاس کیا۔ لیکن شکل و صورت کے اعتبار سے سردار زور آورسنگھ ساوك کے مقابلے میں زیادہ معمر نظر آتا تھا۔ ساوک شاید خون کی کمی کے باعث بہت ہی چھوٹا معلوم ہوتا تھا۔ ایسا لگتا تھا کہ اس کی عمر اٹھارہ برس سے زیادہ نہیں لیکن سردار زور آور سنگھ چالیس کے اوپر معلوم ہوتا تھا۔
سردار زور آور سنگھ کنوارا تھا۔ جنگ کا زمانہ تھا ۔ اس نے گورنمنٹ سے کئی ٹھیکے لے رکھے تھے۔ اس کا باپ بہت پرانا گورنمنٹ کنٹریکٹر تھا لیکن باپ بیٹے میں بنتی نہیں تھی۔ سردار زور آور سنگھ آزاد خیال تھا لیکن وہ اپنے باپ ہی کے ساتھ رہتا تھا، پر وہ ایک دوسرے سے بات نہیں کرتے تھے۔ البتہ اس کی ماں اس سے بہت پیار کرتی تھی جیسے وہ چھوٹا سا بچہ ہے ۔ اس کی وجہ یہ تھی کہ وہ ماں کا اکلوتا لڑکا تھا۔ تین لڑکیاں تھیں، وہ اپنے گھرمیں آباد ہوچکی تھیں۔اب اس کی خواہش تھی کہ وہ شادی کرلے اور اس کے کلیجے کو ٹھنڈک پہنچائے مگر وہ اس کے متعلق بات کرنے کے لئے تیار ہی نہیں تھا۔
میں نے ایک دفعہ اس سے دریافت کیا۔” سردار صاحب آپ شادی کیوں نہیں کرتے؟”
اس نے مونچھوں کے اندر ہنس کر جواب دیا ۔”کروں گا ، اتنی جلدی کیا ہے ؟:”
میں نے پوچھا۔ “آپ کی عمر کیا ہے ؟ “
اس نے کہا۔ “آپ کا کیا خیال ہے ؟
” میرے خیال کے مطابق آپ کی عمر غالباً چالیس برس ہو گی۔”
سردار زور آور سنگھ مسکرآ یا ۔ “آپ کا اندازہ غلط ہے !”
“آپ فرمائے، آپ کی کیا عمر ہے ؟“
سردار زور آور سنگھ پھر مسکرایا ۔ میں آپ سے بہت چھوٹا ہوں ۔عمر کے لحاظ سے بھی ––میں ابھی پرسوں انتیس اگست کو پچیس برس کا ہوا ہوں۔
میں نے اپنے غلط اندازے کی معافی چاہی لیکن آپ کی شکل صورت سے جہاں تک میں سمجھتا ہوں کوئی بھی یہ نہیں کہہ سکتا کہ آپ کی عمر پچیس برس ہے سردار زور آور سنگھ ہنسا میں سکھ ہوں –––اور بڑا غیرمعمولی سکھ۔ یہ کہہ کر اس نے غور سے مجھے دیکھا ۔”منٹو صاحب آپ حجامت کیوں نہیں کرواتے اتنے بڑے بالوں سے آپ کو وحشت نہیں ہوتی؟“
میں نے گردن پر ہاتھ پھیرا۔ بال واقعی بہت بڑھے ہوئے تھے۔ غالباً تین مہینے ہو گئے تھے جب میں نے بال کٹوائے تھے ۔ سردار زور آورسنگھ نے بات کی تو مجھے سر پر ایک بوجھ سا محسوس ہوا ۔” یا دہی نہیں رہا ۔اب آپ نے کہا ہے تو مجھے وحشت محسوس ہوئی ہے۔خدا معلوم مجھے کیوں بال کٹوانے یاد نہیں رہتے –––یہ سلسلہ ہے ہی کچھ واہیات ۔ ایک گھنٹہ نائی کے سامنے سرنیوڑھائے بیٹھے رہو۔ وہ اپنی خرافات بکتا رہے اور آپ مجبوراً کان سمیٹے سنتے رہیں –––فلاں ایکٹرس ایسی ہے، فلاں ایکٹرس ویسی ہے ، امریکہ نے ایٹم بم ایجاد کر لیا ہے۔ روس کے پاس اس کا بہت ہی تکڑا جواب موجودہے ۔ یہ اٹیلی کون ہے ؟ –––اور وہ مسولینی کہاں گیا–––اب میں اگر اس سے کہوں کہ جہنم میں گیا ہے تو وہ ضرورپوچھتا کہ صاحب کیسے گیا کس راستے سے گیا۔ کون سے جہنم میں گیا ۔
میری اتنی لمبی چوڑی بات سن کر سردار زور آور سنگھ نے اپنی سفید پگڑی اتاری –––مجھے سخت حیرت ہوئی ۔ اس لئے کہ اس کے کیس ندارد تھے ۔ ان کے بجائے ہلکے خسخسی بال تھے۔لیکن وہ پگڑی کچھ اس انداز سے باندھا تھا کہ معلوم ہوتا تھا کہ اس کے کیس ہیں اور ثابت و سالم ہیں ۔
بڑی صفائی سے پگڑی کو اس نے میری تپائی پر رکھی اورمسکرا کر کہا ۔ “میں تو اس سے بڑے بال کبھی برداشت نہیں کر سکتا ۔”
میں نے اس کے بالوں کے متعلق کوئی بات نہ کی ، اس لئے کہ میں نے مناسب خیال نہ کیا ۔ اس نے بھی ان کے متعلق کوئی بات نہ چھیڑی ۔پگڑی تپائی پر رکھ دینے کے بعد اس نے صرف اتنا کہا تھا ۔ میں تو اس سے بڑے بال بھی برداشت نہیں کر سکتا۔ اس کے بعد اس نے گفتگو کا موضوع بدل دیا۔ اور کہا ۔”منٹو صاحب ، خورشید کے لئے آپ کچھ کیجئے۔”
” میں کچھ نہ سمجھا ۔”کون خورشید ؟”
سردار زور آور سنگھ نے پگڑی اٹھا کر اپنے سر پر رکھ لی ” خورشید کا پڑیا کے لئے ۔”
“میں ان کی کیا خدمت کر سکتا ہوں۔”
” اس کو گانے کا بہت شوق ہے۔”
مجھے معلوم نہیں تھا۔ کہ خورشٹ گاتی ہے۔ “کیسا گاتی ہیں ؟”
سردار زور آور سنگھ نے خورشٹ کی گائکی کے بارے میں اتنی تعریف کی کہ مجھے سب مبالغہ معلوم ہوا،” منٹو صاحب بہت اچھی آواز پائی ہے۔خصوصاً ٹھمری ایسی اچھی گاتی ہے کہ آپ وجد میں آجائیں گے۔ آپ کو ایسا معلوم ہوگا کہ خان صاحب عبدالکریم کو سن رہے ہیں۔ اور لطف یہ کہ خورشید نے کسی کی شاگردی نہیں کی –––بس جو ملا ہے قدرت سے ملا ہے۔ آپ آج شام کو آیئے –––مسزمنٹو بھی ضرور تشریف لائیں ۔ میں خورشید کو بلاؤں گا۔ آپ ذرا اسے سنے گا۔”
میں نے کہا۔” ضرور ،ضرور –––مجھے معلوم نہیں تھا کہ وہ گاتی ہیں ۔”
سردار زور آورسنگھ نے سفارش کے طور پر کہا۔ “آپ ریڈیو اسٹیشن میں ہیں میں چاہتا ہوں کہ خورشید کو ہر مہینے کچھ پروگرام مل جایا کریں۔ روپے کی اُس کو کوئی خواہش نہیں ہے ۔”
لیکن اگر ان کو یہ پروگرام ملے گا تو معاوضہ بھی ضرور ملے گا ۔گورنمنٹ ان کا معاوضہ کس کھاتے میں ڈالے گی ؟”
یہ سن کر سردار زور آور سنگھ مسکرا یا۔” تو ٹھیک ہے لیکن اسے پروگرام ضرور دلوایئے گا–––مجھے یقین ہے کہ سننے والے اسے بہت پسند کر لیں گے ۔”
اس گفتگو کے بعد ہم تیسرے روز ساوک کے ہاں گئے۔ وہ موجود نہیں تھا لیکن ڈرائنگ روم میں سردار زور آورسنگھ بٹھا سگریٹ پی رہا تھا۔ پارسیوں میں سگریٹ پینا منع ہے، سکھ بھی سگریٹ نہیں پیتے ، لیکن وہ بڑے اطمینان اور ٹھاٹ سے کش پہ کش لے رہا تھا ۔میں اور میری بیوی کمرے میں داخل ہوئے تو اس نے سگریٹ پینا بند کر دیا۔ ایش ٹرے میں اس کی گردن مروڑ کر اس نے ہمیں خالص اسلامی انداز میں سلام کیا اور کہا ۔ “خورشید کی طبیعت آج کچھ ناساز ہے۔”
خورشید کچھ دیر کے بعد آئی تو میں نے محسوس کیا کہ اس کی طبیعت قطعاً ناساز نہیں ہے میں نے اس سے پوچھا۔ تو اس نے اپنے موٹے ہونٹوں پر مسکراہٹ پیدا کر کے کہا۔ ذرا ز کام تھا۔”
مگر اس کو زکام نہیں تھا۔ سردار زور آور سنگھ نے بڑے زور دار انداز میں خورشید سے اس کا حال پوچھا ، زکام کے لئے کم از کم دس دوائیں تجویز کیں، پانچ ڈاکٹروں کے حوالے دیئے ،مگر وہ خاموش رہی، جیسے وہ اس قسم کی بکواس سننے کی عادی ہے۔ اتنے میں خورشید کا خاوند ساوک کاپڑیا آ گیا۔ دفتر میں کام کی زیادتی کی وجہ سے اسے دیر ہو گئی تھی مجھ سے اور میری بیوی سے اس نے معذرت چاہی ، سردار زورآور سنگھ سے کچھ دیر مذاق کیا اور ہم سے چند منٹ کی رخصت لے کر اندر چلا گیا ، اس لئے کہ اسے اپنی بچی کو دیکھنا تھا۔
اس کی پلّو ٹھی کی بچی بہت پیاری تھی۔ میاں بیوی کی بس یہی ایک اولاد تھی۔قریبا ڈیڑھ برس کی تھی۔ رنگ باپ کی طرح زرد––– کُچھ نقش ماں پر تھے ۔ باقی معلوم نہیں کس کے تھے۔ بہت ہنس مکھ تھی۔ اس کو گود میں اٹھا کر لایا۔ اور ہمارے پاس بیٹھ گیا ۔ اس کو اپنی بچی سے بے حد پیار تھا۔ دفتر سے واپس آکر وہ سارا وقت اس کے ساتھ کھیلتا رہتا۔ میرا خیال ہے قریب قریب ہر ہفتے وہ اس کے لئے کھلونے لاتا تھا۔ شیشوں والی بڑی الماری تھی ۔ جو ان کھلونوں سے بھری ہوئی تھی۔
سردار زور آورسنگھ کے متعلق بات چھڑی تو ساوک نے اس کی بہت تعریف کی۔ اس نے مجھ سے اور میری بیوی سے کہا۔ “سردار زور آور میرا بہت پُرانا دوست ہے ۔ ہم دو نولنگوٹیے ہیں۔ اس کے والد صاحب اور میرے والدصاحب اسی طرح لنگوٹیے تھے۔ دونو اکھٹے پڑھا کرتے تھے۔ پہلی جماعت سے اب تک ہم دونو ہر روز ایک دوسرے سے ملتے رہے ہیں بعض اوقات تو مجھے ایسا محسوس ہوتا ہے کہ ہم اسکول ہی میں پڑھ رہے ہیں۔“
سردار زور آورسنگھ مسکراتا رہا۔ اس کے سرپر سکھوں کی بہت بڑی پگڑی تھی مگر مجھے اس کے ہوتے ہوئے اس کے سر کے خسخسی بال نظر آ رہے تھے۔ اور مجھے اپنے سر پر اپنے بالوں کا بوجھ محسوس ہورہا تھا ۔
سردار زور آور سنگھ کے پیہم اصرار پر خورشید نے باجا منگا کر ہمیں گانا سنایا۔ وہ کن سری تھی لیکن خورشید، اس کے خاوند اور سردار زور آور سنگھ کی خاطرمجھے اس کے گانے کی مجبورا تعریف کرنا پڑی میں نے صرف اتنا کہا۔” ماشاء اللہ آپ خوب گاتی ہیں“
سردار زورآورسنگھ نے بڑے زور سے تالی بجائی اور کہا۔ “خورشید آج تونے تو کمال کر دیا ہے۔” پھر مجھ سے مخاطب ہوا۔ “اس کو آفتاب موسیقی کا خطاب مل چکا ہے منٹو صاحب۔“
میں نے تو کچھ نہ کہا لیکن میری بیوی نے پوچھا۔ ” کب ؟”
سردار زور اورسنگھ نے کہا۔” اخبار کا وہ کٹنگ لانا ۔ “
خورشید اخبار کا کٹنگ لائی کوئی خوشامدی قسم کا رپورٹر تھا جس نے چھ مہینے پہلے ایک پرائیویٹ محفل میں خورشید کا گانا سن کر اسے آفتاب موسیقی کا خطاب عطا فرمایا تھا۔ میں یہ کٹنگ پڑھ کرمسکرا یا اور شرارتاً خورشیدسے کہا۔ “آپ کا یہ خطاب غلط ہے !“
سردار زدرآ و رسنگھ نے مجھ سے پوچھا۔” کیوں ؟ “
میں نے پھر شرارتاً کہا۔ عورت کے لئے آفتاب نہیں –––آفتا بہ ہونا چا خورشید صاحبہ آفتاب ِموسیقی نہیں۔ آفتابہ ءموسیقی ہیں۔ “
میرا مذاق سب کے سر پر سے گذر گیا۔ میں نے خدا کا شکر کیا ،کیونکہ یہ مذاق کرنے کے بعد میں نے فوراً ہی سوچا تھا کہ اور کوئی نہیں تو سردار زور آور سنگھ ضرور اس کو سمجھ جائے گا مگر وہ مسکرایا ۔ یہ اخبار والے ہمیشہ غلط زبان لکھتےہیں۔ آفتاب کی جگہ آفتا بہ ہونا چاہیئے تھا۔ آپ بالکل صحیح فرماتے ہیں۔
میں نے اور کچھ نہ کہا ، اس لئے کہ مجھے احساس تھا کہ کہیں میرا مذاق فاش نہ ہو جائے۔
ساوک کچھ اور ہی خیالات میں غرق تھا۔ اس کو سردار زور آور سنگھ دوستی کے واقعات یاد آ رہے تھے۔مسٹر منٹو ، ایسا دوست مجھے کبھی نہیں ملے گا۔ اس نے ہمیشہ میری مدد کی ہے۔ ہمیشہ میرے ساتھ انتہائی خلوص بنتا ہے پچھلے دنوں میں ہسپتال میں بیمار تھا۔ اس نے نرسوں سے بڑھ کہ میری خدمت کی میرے گھر بار کا خیال رکھا۔ خورشید اکیلی گھبرا جاتی مگر اس نے ہر طرح اس کی دلجوئی کی میری بیٹی کو گھنٹوں کھلاتا رہا۔ اس کے علا وہ میرے پاس بیٹھ کر کئی اخبار پڑھ کر سناتا رہا۔ میں اس کا شکریہ ادا نہیں کرسکتا۔”
یہ سن کر سردار زور آور سنگھ مسکرا یا اور خورشید سے مخاطب ہوا ۔خورشید آج تمہارا خاوند بہت سنٹی مینٹل ہو رہا ہے –––میں نے کیا کیا تھا جو یہ میری اتنی تعریف کر رہا ہے ۔“
ساوک نے کہا بکو اس نہ کرو–––تمہاری تعریف میں کر ہی نہیں سکتا ۔میں صرف اتنا کہہ سکتا ہوں کہ تمہاری دوستی پر مجھے ناز ہے اور ہمیشہ رہے گا ۔ بچپن سے لے کر اب تک تم ایک سے رہے ہو۔ میرے ساتھ تمہارے سلوک میں کبھی فرق نہیں آیا ۔”
میں نے سردر زور آور سنگھ کی طرف دیکھا۔ وہ یہ تعریفی کلمات یوں سن رہا تھا ۔ جیسے ریڈیو سے خبریں۔ جب ساوک بول چکا تو اس نے مجھ سے پوچھا ” تو خورشید کو پروگرام مل جائیں گے نا ؟
میں نے چونک کر جواب دیا۔”جی؟ ––– میں کوشش کروں گا۔”
سردار زور آور سنگھ نے ذرا حیرت سے کہا کوشش ؟ –––یعنی ان کے لئے پر وگرام حاصل کرنے کے لئے آپ کو کوشش کرنی پڑے گی۔ آپ بھی کمال کرتے ہیں––– کل صبح ان کو اپنے ساتھ لے جائیے۔ میرا خیال ہے ان کا گانا سنتے ہی میوزک ڈائرکٹراسی مہینے میں ان کو کم از کم دو پروگرام دے دے گا ۔”
میں نے اس کی دل شکنی مناسب نہ سمجھی اور کہا ، “یقینا ۔”
لیکن خورشید نے سردار زور آور سنگھ سے کہا۔ “میں صبح نہیں جاسکتی۔ بے بی صبح کو میرے بغیر گھر میں نہیں رہ سکتی۔ دوپہرکو البتہ جاسکتی ہوں۔”
سردار زور آور سنگھ مجھ سے مخاطب ہوا منٹو صاحب ، واقعی بچی اس کو صبح بہت تنگ کرتی ہے میں کسی روز خورشید کو دوپہر کے وقت ریڈیو اسٹیشن لے آؤں گا ۔“
خورشید کو دوپہر کے وقت ریڈ یوٹیشن لانے کی نوبت نہ آئی۔ کیونکہ میں نے دوسرے روز ہی ایک دم ارادہ کیا کہ میں دلی چھوڑ کر بمبئی چلا جاؤں گا ۔چنانچہ اس سے اگلے دن استعفے دے کر ممبئی روانہ ہو گیا۔ میری بیوی مجھ سے کچھ دن بعدچلی آئی۔ ہم مسز خورشٹ کا پڑیا اور سردار زور آور سنگھ کو بھول گئے ۔
میں ایک فلم کمپنی میں ملازم تھا بیماری کے باعث اتفاق سے ایک روز میں وہاں نہ گیا۔ دوسرے روز وہاں پہنچا تو گیٹ کیپر نے مجھے ایک کا غذ دیا کہ کل ایک صاحب آپ سے ملنے یہاں آئے تھے ۔ وہ یہ دے گئے ہیں میں نے رقعہ پڑھا۔ سردار زور آور سنگھ کا تھا۔ مختصرسی تحریر تھی میں اور میری بیوی آپ سے ملنے یہاں آئے مگر آپ موجود نہیں تھے –––ہم تاج ہوٹل میں ٹھرے ہیں۔ اگر آپ تشریف لائیں تو ہمیں بڑی خوشی ہوگی مسز منٹو کو ضرور ساتھ لائےگا۔
کمرے کا نمبر وغیرہ درج تھا۔ میں اور میری بیوی اسی شام ٹیکسی میں تاج ہوٹل گئے۔ کمرہ تلاش کرنے میں کوئی دقت نہ ہوئی سردار زور آور سنگھ وہاں موجود تھا۔ ہم جب اندر کمرے میں داخل ہوئے تو وہ اپنے چھوٹے چھوٹے خسخسی بالوں میں کنگھی کر رہا تھا۔ بڑے تپاک سے ملا۔ میری بیوی اس کی بیوی کے دیکھنے کے لئے بے قرارتھی، چنانچہ اس نے پوچھا سردار صاحب آپ کی مسز کہاں ہیں“۔
سردار زور آور سنگھ مسکرا یا ۔”ابھی آتی ہیں ۔ باتھ روم میں ہیں ۔ “
اس نے یہ کہا اور دوسرے کمرے سے خورشٹ نمودار ہوئی میری بیوی اٹھ کر اس سے گلے ملی اور سب سے پہلا سوال اس سے یہ کیا “بچی کیسی ہے خورشید ؟”
خورشٹ نے جواب دیا ۔ ” اچھی ہے ۔ “
پھر میری بیوی نے اس سے پوچھا ۔” سا وک کہاں ہیں ؟ “
خورشٹ نے کوئی جواب نہ دیا ۔جب وہ اور میری بیوی پاس پاس بیٹھ گئیں میں سردار زور آور سنگھ سے پوچھا۔ سردار صاحب آپ اپنی بیوی کو با ہر نکالئے۔“
سردار زور آور سنگھ مسکرایا خورشٹ کی طرف دیکھ کر اس نے کہا۔ خورشید میری بیوی کو باہر نکالو۔”
خورشٹ میری بیوی سے مخاطب ہوکر مسکرائی کہ میں نے سردار زورآورسنگھ سے شادی کرلی ہے۔ ہم یہاں ہنی مون منانے آئے ہیں۔
میری بیوی نے یہ سنا تو اس کی سمجھ میں کچھ نہ آیا کہ کیا کہے۔ اٹھی اور میرا ہاتھ پکڑ کر کہا۔ چلئے سعادت صاحب اور ہم کمرے سے باہر تھے ۔خدا معلوم سردار زور آور سنگھ اور خورشٹ نے ہماری اس بدتمیزی کے متعلق کیا کہا ہوگا ۔
28 جولائی 1950
