deewan e momin ki radeef Alif ki ibtedai 5 Ghazlen

1؎قاتل کا نمکدان شور محشر سے بھرا ہوگا اور محشر اور فریاد لازم و ملزوم ہیں۔ اس لیے نمک پاشی سے لبِ زخم کا مائل فریاد ہوناحق بجانب ہوگا۔ گویا فریادِ زخمِ عاشق، کم حوصلگی کا نتیجہ نہیں بلکہ بیداد معشوق قدرۃً محرک فغاں ہے۔ شور اور نمکدان کی رعایت ظاہر۔

2؎ناکامی عشق کا علاج اگر ہوسکتا ہے تو امید ہی سے ۔ خواہ وہ امید مرگ ہی کیوں نہ ہو یعنی امید سے بہر حال سروکار رہتا ہے۔ کچھ نہیں تو موت ہی کی امید سہی۔

3؎شبِ ہجراں میں کامرانی وصل یاد آئی جب بستر مخمل پر دوست کے ساتھ داد عیش دے رہے تھے۔ ایسی حالت میں میں یادِ عیش گذشتہ سے سوئے ہوئے نصیب کا خواب کس قدر پریشان ہوگا یعنی یاد وصل، خفتہ طالعی کی تلخی میں اور اضافہ کرے گی۔ لفظ خواب میں ایہام ہے۔

4؎اگر علاج ہوا تو درد جاتا رہے گا۔ لیکن چوں کہ درد، جان کے عوض تمام جسم میں سرایت کیے ہوئے ہے اس لیے درد کا زائل ہونا اور جان کا جانا مترادف ہوں گے۔

ساری: اثر کرنے والا

5؎وحشت دل زنداں سے گھبرا کر بیاباں نوردی پر ابھارتی ہے۔ جس پر مومن کہتا ہے کہ اگر میری سبز قدمی سلامت ہے تو ایک دن زنداں ہی ویران ہوکر بیابان ہوجائے گا۔

6؎یہاں دہان گور کے کشادہ ہونے کو اس کے خنداں ہونے سے تعبیر کیا ہے۔ شاعر کی ایذا پسندی کو عیش و خوشی سے اتنی سی مناسبت بھی  گوارا نہیں اور محض اسی وجہ سے نزع میں روتا ہے۔

7ْ؎معشوق نے عہد کیا تھا کہ رقیبوں سے بات نہ کرے گا لیکن بات کی جس سے اُدھر اُس کا عہد ٹاٹا، اِدھر عاشق کا دل یعنی اس کا عہداور اس کا دل دونوں بودے نکلے۔

8؎ چارہ جو نے دیوانہ کے چاک گریباں میں معشوق کے پردوہ در کا پیوند لگایاہے کہ شاید اس سے تسکین خاطر ہو یا اس کا ادب کرکے جامہ دری سے باز رہے۔ مگر دیوانہ بدرجہ اولی اس کو چاک کرے گا کیوں کہ وہ ہمیشہ سے معشوق کے پردے کا دشمن ہے۔