01 Urdu Ghazal: Fan, Aghaz aur Irtaqa

اردو شاعری میں غزل کے سوا بھی بہت کچھ ہے۔ قصیدہ، مرثیہ، مثنوی مگر جو قبولِ عام غزل کو حاصل ہوا وہ کسی اور صنف کو نصیب نہ ہوسکا۔ پروفیسر رشیداحمد صدیقی نے اسے بجا طور پر اردو شاعری کی آبرو کہاہے۔ تنقید کے آغازسے ہی غزل کی مخالفت بھی شروع ہوگئی۔ حالی کو اس میں سنڈاس کی بدبو محسوس ہوئی، کلیم الدین احمد نے اسے نیم وحشی صنف سخن ٹھہرایا، عظمت اللہ خاں نے مشورہ دیا کہ غزل کی گردن بے تکلف اڑا دینی چاہیے۔ ایسی شدید مخالفت کے باوجود غزل کی مقبولیت میں ذرا برابر کمی نہ آئی ، اضافہ ہوتا رہا۔

غزل بنیادی طور ر ایک داخلی صنفِ سخن ہے، یعنی غزل کا شاعر وہی بیان کرسکتا ہے جواس کے دل پر گذری ہو، شاعر کے دل پر گزرنےوالی کیفیات وہی ہوتی ہیں جو دوسروں پر بھی بیت چکی ہوتی ہے، لہذا پڑھنے والے یا سننے والے کو غزل میں اپنی داستان سنائی دیتی ہے ۔ اس طرح غزل میں آپ بیتی جگ بیتی بن جاتی ہے۔

غزل عربی زبان کا لفظ ہے اس کے معنی ہیں عورتوں سے باتیں کرنا یا عورتوں کی باتیں کرنا

مختلف علمائے فن اپنی بساط روّیے اور ذوق کے مطابق غزل کی تعریف کرتے رہے ہیں۔ کسی نے غزل کی عورتوں سے بات کرنا بتایا، کسی نے جمالِ معشوق کا ذکر اور احوالِ عشق و محبّت ِ باہمی کے بیان کو غزل کہا، کسی نے اسے ایسے نوائے درد کہا جو خلشِ الم کے ساتھ ساتھ قلب و رح کےلیے انبساط کا سامان مہیا کرتی ہے۔

غزل دراصل مخصوص لفظیات اور علامتوں کے ذریعے حسن و عشق، کیفیات و واردات ِ عشق، اخلاق و تصوف ، فلسفہ و حکمت، اسرار و رموزحیات و کائنات کی عقدہ کشائی اور زمانے کے حالات و کوائف بیان کرنے کا فن ہے۔ جس میں حاوی رجحان حسن و عشق کا ہے۔غزل کی مخصوص لفظیات سے مراد یہ ہے کہ غزل تمام شعری اصناف میں نازک ترین صنف ہے جو نامانوس، ثقیل، ادق، بعید از فہم الفاظ کی متحمل نہیں ہوسکتی۔

غزل کے اجزائے ترکیبی میں: مطلع، مقطع، ردیف، قافیہ اور بحر شامل ہیں۔

غزل کے تمام مصرعے ایک ہی وزن اور ایک ہی بحر میں ہوتے ہیں۔ غزل کا پہلا شعر مطلع کہلاتا ہے اور اس کے دونوں مصرعے ہم قافیہ یا ہم قافیہ اور ہم ردیف ہوتے ہیں۔

شعر کا وزن کرنے یا اسے ناپنے کے پیمانے بحر کہلاتے ہیں جو چھوٹی بڑی بھی ہوسکتی ہیں اور آسان یامشکل بھی۔ یہ فن عروض کہلاتا ہے۔

ردیف وہ لفظ یا الفاظ کا وہ مجموعہ ہے جسے ہر شعر کے آخر میں دہرایاجائے۔ اس سے پہلے قافیہ ہوتا ہے جس کا آخری حرف یاآخر کے چند حرف یکساں ہوتے ہیں۔ ہم وزن و ہم آہنگ ہوتے ہیں۔

پروفیسر مسعود حسین خاں لکھتے ہیں "غزل کے پاؤں میں ردیف پایل یا جھانجھن کا حکم رکھتی ہے، یہ اس کی موسیقیت، ترنم، موزونیت کو بڑھاتی ہے۔”

غزل کا آخری شعر جس میں شاعر اپنا تخلّص استعمال کرتا ہے مقطع کہلاتا ہے۔

مطلع یا مقطع لانا لازمی نہیں لیکن مطلع کے بغیر غزل ناقص الاوّل اور مقطع کے بغیر ناقص الآخر معلوم ہوتی ہے

حسنِ مطلع (زیب مطلع) مطلع کے فوراً بعد آنے والے شعر کو کہتے ہیں۔

گیان چند جین کے مطابق ایک مطلع کے بعد دوسرا مطلع آئے تو اسے حسنِ مطلع کہتے ہیں۔

فاروقی صاحب کا موقف تھا کہ دوسرے مطلع کو مطلع ثانی، تیسرے کو مطلع ثالث کہیں گے، حسن مطلع صرف اس پہلے شعر کو کہیں گے جس کے پہلے مصرع میں قافیہ نہ ہو۔

دلِ ناداں تجھے ہواکیا ہے:: آخر اس درد کی دواکیا ہے

ہم ہیں مشتاق اور وہ بیزار:: یا الٰہی یہ ماجراکیا ہے

ہم نے مانا کہ کچھ نہیں غالبؔ

مفت ہاتھ آئے تو براکیا ہے

غزل کے سب سے عمدہ شعر کو بیت الغزل کہا جاتا ہے۔

غزل کا ہر شعر اپنے معنی الگ دیتا ہے کبھی ایسا بھی ہوتا ہے کہ دو یا دو سے زیادہ شعر مل کر معنی دیتے ہیں تو انھیں قطعہ بند کہا جاتا ہے۔

غزلِ مسلسل میں مختلف اشعار میں ایک معنوی ارتباط و ارتقا ہوتا ہے۔

غزل کے شاعر کو دو مصرعوں میں مکمّل مضمون ادا کرنا پڑتا ہے اس لیے وہ اختصار اور رمز و کنایے سے کام لینے پر مجبور ہے۔

غزل کے اشعار کی تعداد کسی نے کم سے کم پانچ اور زیادہ سے زیادہ گیارہ بتائی لیکن دوسروں نے کم سے کم تین اور زیادہ سے زیادہ پچیس مقرر کی لیکن ان میں سے کسی کی پابندی نہیں کی گئی۔

کم سے کم چار اور پانچ ہوتی ہے اور زیادہ سے زیادہ سترہ اگر اس کے بعد اور اشعار کہنے ہوں تو درمیان میں ایک مطلع کہنا ضروری ہے۔

ویسے قاعدہ یہ ہے کہ ایک زمین میں زیادہ اشعار ہوجانے پر انھیں کئی غزلوں میں بانٹ دیتے ہیں اور انھیں دو غزلہ، سہ غزلہ وغیرہ کہتے ہیں۔

بحرالفصاحت کے مطابق امداد علی بحر اور مولوی مذاق نے ہفت غزلہ تک لکھا ہے۔

زمین: غزل کی ردیف و قافیہ و وزن کو ملا کر زمین کہتے ہیں۔ بحرالفصاحت میں لکھا ہے

"زمینِ غزل مراد ردیف و قافیہ سے ہے مع قیدِ بحر کے۔”