Kulliyat-e-Shaad ki radeef BA ki ibtedai 5 Ghazlen

نالہء دل میں تو پایا نہ اثر آخر شب

اے دعا تو مجھے محروم نہ کر آخر شب

اکثر اے درد جگر تجکو بھی غافل پایا

کون لیتا ہے مریضوں کی خبرآخر شب

شام سے یاس نے گھیرا تجھے ناحق اے دل

جاتی ہے عرش تلک آہ اگر آخر شب

خود بخود غنچہ ء خاطر ہے شگفتہ میرا

دل نے کس بات کی پائی ہے خبر آخر شب

واسطہ ضبط کا آغاز شب فرقت کے

چشم تر تو مجھے شرمندہ نہ کر آخر شب

دور جانا ہے مسافر تجھے کیسی ہے یہ نیند

چونک مل آنکھ اٹھا زاد سفر آخر شب

جھاڑتی جاتی ہے و راہ صَبا بالوں سے

بوئے گُل باغ سے جاتی ہے جدھر آخر شب

ٹھنڈے ٹھنڈے دل سوزاں سے نکل جا اے روح

کرتے ہیں موسم گرما میں سفر آخر شب

مطمئن ہو تو خدا کے لیے کچھ عرض کروں

دردِ دل بس، مجھے بے چین نہ کر آخر شب

بے خود دل نہ اڑا کر کہیں لے جائے مرا

بیشتر چور کا رہتا ہے خطر آخر شب

کہیں اس سیل میں بہہ جائے نہ دفتر غم کا

جوش اپنا نہ دکھا دیدہء ترآخر شب

شوقِ دیدار میں عالم ہے یہ آنکھوں کا مری

جیسے جاگے ہوئے انساں کی نظر آخر شب

ہوگیا دل کو یقیں صاف کہ پانی برسا

بستر اپنا ہوایوں اشکوں سے تر آخر شب

تیرے کوچے میں کہیں شادؔنہ ہو پوچھ تو لے

اک بڑا شور تھا نالوں کا اِدھر آخر شب